منہاج القرآن انٹرنیشنل کے صدر پروفیسر ڈاکٹر حسین محی الدین قادری کی مصطفوی سٹوڈنٹ موومنٹ کے زیرِاہتمام تین روزہ تربیتی کیمپ میں شریک گلگت بلتستان کے طلبہ سے ملاقات
پروفیسر ڈاکٹر حسین محی الدین قادری نے طلبہ سے ملاقات کے موقع پر پر گفتگو کرتے ہوئے کہا کہ اللہ پاک نے ہمیں عبادت کے لیے پیدا کیا ہے اور عبادت درحقیقت خدمت ہے جس کے دو بنیادی پہلو ہیں: حقوقُ اللہ اور حقوقُ العباد۔
انہوں نے کہا کہ عبادت کی حقیقی ادائیگی ایسے کیمپس اور تربیتی نشستوں سے شعور حاصل کرنے سے ممکن ہے۔ ان تربیتی نشستوں کے ذریعے نوجوانوں کو دینی و اخلاقی اقدار، کردار سازی اور قیادت کے اصولوں کی آگاہی حاصل ہوتی ہے جو ان کے مستقبل کو سنوارنے میں مددگار ثابت ہوتی ہے۔
انہوں نے طلبہ کو نصیحت کرتے ہوئے کہا کہ وہ حلال و حرام کی پہچان کریں، بری بات دیکھنے اور سننے سے بچیں اور نماز کی مکمل پابندی کریں۔ مزید برآں طلبہ کو چاہیے کہ وہ اپنے وقت کا بہترین مصرف بنائیں، تعلیم اور خودسازی پر توجہ دیں اور اپنے اندر قیادت و خدمت کا جذبہ پیدا کریں۔
پروفیسر ڈاکٹر حسین محی الدین قادری نے نوجوانوں کو پیغام دیتے ہوئے کہا کہ وہ اللہ اور اس کے رسول ﷺ کے احکامات کی بجاآوری کو یقینی بنائیں، محنت کریں، اور پروفیشنل زندگی کے ساتھ ساتھ سوشل لائف کو بھی متوازن انداز میں گزارنے کی کوشش کریں۔
اس موقع پر نائب ناظم اعلیٰ خیبرپختونخوا چوہدری عرفان یوسف، مرکزی صدر مصطفوی سٹوڈنٹس موومنٹ شیخ فرحان عزیز اور دیگر ذمہ داران بھی موجود تھے۔
تبصرہ